തൃശൂര് ജില്ലയുടെ വിവിധ ഭാഗങ്ങളില് നാല് സെക്കന്റ് വരെ നീണ്ടു നിന്ന ഭൂചലനം അനുഭവപ്പെട്ടു. കുന്നംകുളം, വേലൂര്, മുണ്ടൂര്, എരുമപ്പെട്ടി കരിയന്നൂര്, വെള്ളറക്കാട്, നെല്ലിക്കുന്ന്, വെള്ളത്തേരി, മരത്തംക്കോട്, കടങ്ങോട് ഭാഗങ്ങളിലാണ് ഭൂചലനമുണ്ടായത്. ഇന്ന് രാവിലെ 8:15നാണ് ശക്തമായ പ്രകമ്പനത്തോടൊപ്പം ഭൂമി കുലുങ്ങുന്നതായി അനുഭവപ്പെട്ടത്. വലിയ ശബ്ദത്തോടെയാണ് പ്രകമ്പനം അനുഭവപ്പെട്ടതെന്നാണ് നാട്ടുകാര് പറയുന്നത്.
വീടുകളില് അടുക്കളയില് ഇരുന്ന പാത്രങ്ങളും വീട്ടുപകരണങ്ങളും ഉള്പ്പെടെ ചലിച്ച് താഴെ വീണു. വിവിധ ഇടങ്ങളില് പരിഭ്രാന്തരായ ആളുകള് വീടിനു പുറത്തേക്ക് ഓടി. ഭൂചലനം ഉണ്ടായ മേഖലകളില് ഉദ്യോഗസ്ഥ സംഘമെത്തി പരിശോധന നടത്താന് ജില്ലാ ഭരണകൂടം നിര്ദേശം നല്കി. തഹസില്ദാരുടെയും ജിയോളജി വിഭാഗം ഉദ്യോഗസ്ഥരുടെ നേതൃത്വത്തിലുള്ള സംഘമാണ് പരിശോധന നടത്തുക.
