തിരുവനന്തപുരം: ടി പി വധക്കേസിലെ പ്രതികള്ക്ക് ശിക്ഷാ ഇളവിന് ശുപാര്ശ ചെയ്ത ഉദ്യോഗസ്ഥരെ സസ്പെന്ഡ് ചെയ്തത് സര്ക്കാരിന്റെ മുഖം രക്ഷിക്കാനുള്ള നടപടിയെന്ന് കെ കെ രമ എംഎല്എ. പ്രതിപക്ഷം നിയമസഭയില് സബ്മിഷന് അവതരിപ്പിക്കാനിരിക്കുന്നതിന്റെ തൊട്ടു മുമ്പാണ് ഉദ്യോഗസ്ഥരെ സസ്പെന്ഡ് ചെയ്തുകൊണ്ടുള്ള ഉത്തരവ് പുറത്തു വന്നത്. പ്രതികള്ക്ക് ശിക്ഷാ ഇളവ് നല്കുന്നത് ഉദ്യോഗസ്ഥര് മാത്രം വിചാരിച്ചാല് നടക്കുന്ന കാര്യമല്ല. സംഭവം വിവാദമായപ്പോള് സര്ക്കാറിന്റെ പുതിയ നീക്കമാണ് സസ്പെന്ഷന് എന്നും കെകെ രമ പറഞ്ഞു.
മുഖ്യമന്ത്രി പിണറായി വിജയനാണ് ജയില് ഉദ്യോഗസ്ഥരെ സസ്പെന്റ് ചെയ്യാന് ഉത്തരവിട്ടത്. കണ്ണൂര് സെന്ട്രല് ജയില് സൂപ്രണ്ടിന്റെ ചുമതലയുള്ള ജോയിന്റ് സൂപ്രണ്ട് കെ എസ് ശ്രീജിത്ത്, അസിസ്റ്റന്റ് സൂപ്രണ്ട് ഗ്രേഡ്-ക ബി ജി അരുണ്, അസിസ്റ്റന്റ് പ്രിസണ് ഓഫീസര് ഒ വി രഘുനാഥ് എന്നിവരെയാണ് അന്വേഷണ വിധേയമായി സര്വീസില് നിന്ന് സസ്പെന്റ് ചെയ്യാന് ഉത്തരവിട്ടത്.
