കൊച്ചി: കളമശ്ശേരിയിലെ കണ്വെന്ഷന് സെന്ററിലുണ്ടായ സ്ഫോടനക്കേസ് പ്രതി ഡൊമിനിക് മാര്ട്ടിന്റെ കസ്റ്റഡി അപേക്ഷ നാളെ പരിഗണിക്കും. ബോംബ് നിര്മിക്കാന് കൂടുതല് ആരെങ്കിലും സഹായത്തിന് ഉണ്ടായിരുന്നോ എന്ന് പരിശോധിക്കും. പ്രതിയെ 10 ദിവസം കസ്റ്റഡിയില് വേണമെന്നാണ് പൊലീസ് ആവശ്യപ്പെട്ടിരിക്കുന്നത്.
ഡൊമിനിക് മാര്ട്ടിന്റെ വിദേശ ബന്ധങ്ങള് പരിശോധിക്കാനുള്ള നടപടികളിലേക്കും പൊലീസ് കടന്നിട്ടുണ്ട്. 15 വര്ഷത്തോളം തുടര്ച്ചയായി ദുബായില് ഉണ്ടായിരുന്ന മാര്ട്ടിന് മറ്റേതെങ്കിലും രാജ്യങ്ങളില് പോയിട്ടുണ്ടോ, സാമ്പത്തിക ഇടപാടുകള് നടത്തിയിട്ടുണ്ടോ തുടങ്ങിയ കാര്യങ്ങള് പരിശോധിക്കും. വാട്സ്ആപ്പ്, ഫേസ്ബുക്ക് തുടങ്ങി പ്രതിയുടെ സാമൂഹിക മാധ്യമ ഇടപെടലുകളിലും പോലീസ് ആഴത്തിലുള്ള അന്വേഷണം നടത്തുന്നുണ്ട്.
