തിരുവനന്തപുരം: കാട്ടാക്കടയില് ഓടിക്കൊണ്ടിരുന്ന കെഎസ്ആര്ടിസി ബസില് നിന്ന് വിദ്യാര്ത്ഥി തെറിച്ചുവീണു. തിരുമല എഎംഎച്ച്എസിലെ പ്ലസ് ടു വിദ്യാര്ഥി സന്ദീപാണ് ബസില് നിന്ന് വീണ് പരിക്കേറ്റത്. വിദ്യാര്ഥി വീണ വിവരം അറിയിച്ചിട്ടും ബസ് നിര്ത്താതെ പോയെന്നാണ് നാട്ടുകാരുടെ ആരോപണം.
ഇന്ന് രാവിലെ സ്കൂളില് പോവാനായി ഇറങ്ങിയതാണ് സന്ദീപ്. എട്ടരയോടെ കാട്ടാക്കട പൊട്ടന്കാവില് നിന്ന് ബസ് കയറി. അന്തിയൂര്ക്കോണം പാലം കഴിഞ്ഞയുടനെയാണ് അപകടം സംഭവിച്ചത്. ഗട്ടറില് വീണ ബസിന്റെ ഡോര് അപ്രതീക്ഷിതമായി തുറന്നതോടെ സന്ദീപ് പുറത്തേക്ക് തെറിച്ചുവീണു. സംഭവം അറിഞ്ഞെത്തിയ കുട്ടിയുടെ പിതാവും നാട്ടുകാരും ചേര്ന്നാണ് സന്ദീപിനെ ആശുപത്രിയില് എത്തിച്ചത്. കുട്ടി വീണതറിഞ്ഞിട്ടും ബസ് ഏറെ ദൂരം നിര്ത്താതെ മുന്നോട്ടുപോയി. നാട്ടുകാര് പിന്തുടര്ന്നെത്തിയാണ് ബസ് തടഞ്ഞിട്ടത്. അപകടത്തില് സന്ദീപിന് രണ്ട് കൈകള്ക്കും വയറിനും പരിക്കുണ്ട്.
