ബംഗളൂരു: കര്ണ്ണാടകയിലെ മണ്ണിടിച്ചിലില് കാണാതായ മലയാളി ട്രക്ക് ഡ്രൈവര് അര്ജുനെ കണ്ടെത്താന് ഡ്രഡ്ജര് എത്തിക്കുമെന്ന് കര്ണാടക സര്ക്കാര്. ഇത് സംബന്ധിച്ച് അര്ജുന്റെ കുടുംബത്തിന് മുഖ്യമന്ത്രി സിദ്ധരാമയ്യ ഉറപ്പ് നല്കി. ഗോവയില് നിന്ന് ഡ്രഡ്ജര് എത്തിക്കുന്നതിന് ആവശ്യമായ എല്ലാ ചെലവും പൂര്ണമായും സംസ്ഥാന സര്ക്കാര് വഹിക്കും. ഡ്രഡ്ജര് കൊണ്ട് വരാന് ഒരു കോടി രൂപയാണ് ചെലവ് പ്രതീക്ഷിക്കുന്നത്.
അര്ജുന്റെ ബന്ധു ജിതിന്, എംകെ രാഘവന് എംപി, മഞ്ചേശ്വരം എംഎല്എ എകെഎം അഷ്റഫ്, കാര്വാര് എംഎല്എ സതീഷ് സെയ്ല് എന്നിവര് ഇന്ന് കര്ണാടക മുഖ്യമന്ത്രിയെ കണ്ടിരുന്നു. ഡ്രഡ്ജര് കൊണ്ടുവന്ന് എത്രയും വേഗം തിരച്ചില് പുനരാരംഭിക്കണമെന്ന് കുടുംബം ആവശ്യപ്പെട്ടതിനെത്തുടര്ന്നാണ് തീരുമാനം. ഗംഗാവലി പുഴയില് മണ്ണ് അടിഞ്ഞതിനാല് ഡ്രഡ്ജിംഗ് നടത്താതെ തെരച്ചില് സാധ്യമാകില്ല. ദുരന്തനിവാരണ വകുപ്പിന്റെ ചുമതല വഹിക്കുന്ന ഉപമുഖ്യമന്ത്രി ഡി കെ ശിവകുമാറിനെയും കുടുംബം ഇന്ന് രാത്രി പത്ത് മണിക്ക് കാണും.
