കോഴിക്കോട്: ലൈംഗികാതിക്രമത്തിന് ഇരയാക്കിയെന്ന യുവാവിന്റെ പരാതിയില് സംവിധായകന് രഞ്ജിത്തിനെതിരെ ജാമ്യമില്ലാ വകുപ്പ് പ്രകാരം കേസ് രജിസ്റ്റര് ചെയ്തു. കോഴിക്കോട് കസബ പൊലീസാണ് കേസ് രജിസ്റ്റര് ചെയ്തത്. ഐടി ആക്റ്റും രഞ്ജിത്തിനെതിരെ ചുമത്തിയിട്ടുണ്ട്. പ്രത്യേക അന്വേഷണസംഘത്തിലെ ഐശ്വര്യ ഡോങ്റെയുടെ നേതൃത്വത്തില് കഴിഞ്ഞ ദിവസം കോഴിക്കോട് കാരപ്പറമ്പില് എത്തി യുവാവില് നിന്ന് മൊഴി രേഖപ്പെടുത്തിയിരുന്നു.
ഹോട്ടല് മുറിയില്വെച്ച് രഞ്ജിത്ത് പീഡിപ്പിച്ചെന്നാണ് യുവാവിന്റെ പരാതി. സിനിമയില് അവസരം തരാമെന്ന് പറഞ്ഞാണ് ബാംഗ്ലൂരിലേക്ക് വിളിപ്പിച്ചതെന്നും തന്റെ നഗ്നചിത്രങ്ങള് അടക്കം രഞ്ജിത്ത് എടുത്തിട്ടുണ്ടെന്നുമാണ് യുവാവിന്റെ പരാതി. നിര്ബന്ധിച്ച് മദ്യം നല്കിയാണ് പീഡിപ്പിച്ചത്. ആരോപണങ്ങങ്ങളില് ഉറച്ചുനില്ക്കുന്നെന്നും കൈയിലുള്ള തെളിവുകള് അന്വേഷണ സംഘത്തിന് കൈമാറുമെന്നും യുവാവ് അറിയിച്ചു. കേസ് പിന്വലിക്കാന് സമ്മര്ദവും ഭീഷണിയും ഉണ്ട്. സ്വാധീനിക്കാന് പലരും ശ്രമിക്കുന്നു. തനിക്ക് നീതിയാണ് ആവശ്യമെന്നും കൂടുതല് കാര്യങ്ങള് വെളിപ്പെടുത്താന് ഉണ്ടെന്നും യുവാവ് പറഞ്ഞു. അന്നുതന്നെ ഇക്കാര്യം ഒരു പ്രമുഖ നടിയെ അറിയിച്ചിരുന്നുവെന്നും എന്നാല് പ്രതികരിച്ചില്ലെന്നും കോഴിക്കോട് കസബ സ്റ്റേഷനില് യുവാവ് നല്കിയ പരാതിയില് പറയുന്നു.
