തിരുവനന്തപുരം: പോലീസ് ക്വാര്ട്ടേഴ്സിലെ മരം മുറി കേസൊതുക്കാന് എംഎല്എ പി വി അന്വറിനെ ഫോണില് വിളിച്ച പത്തനംതിട്ട എസ്പി സുജിത് ദാസിന് സസ്പെന്ഷന് ഇല്ല. നടപടി സ്ഥലംമാറ്റത്തിലൊതുക്കി. പൊലീസ് സേനക്ക് നാണക്കേടുണ്ടായ സംഭവമാണ് ഓഡിയോ പുറത്ത് വന്നതിലൂടെ ഉണ്ടായത്. ഉന്നത ഉദ്യോഗസ്ഥര്ക്കെതിരായ നീക്കത്തിന് എംഎല്എയെ പ്രേരിപ്പിച്ചതും ഗുരുതര ചട്ടലംഘനമാണെന്നും റിപ്പോര്ട്ടില് പറയുന്നു.
പൊലീസ് ആസ്ഥാനത്ത് എത്തി സംസ്ഥാന പൊലീസ് മേധാവി ഡിജിപി ഷെയ്ഖ് ദര്വേസ് സാഹിബിന് മുന്നില് ഹാജരാകാനാണ് നിര്ദ്ദേശം നല്കിയത്. പത്തനംതിട്ട എസ്പി സ്ഥാനത്ത് വിജി വിനോദ് കുമാറിനെ നിയമിച്ച് സര്ക്കാര് ഉത്തരവിറക്കി. പി വി അന്വറുമായുള്ള ഫോണ്വിളിയില് കുടുങ്ങിയതിനെ തുടര്ന്ന് സുജിത് ദാസിനെ സസ്പെന്ഡ് ചെയ്യുമെന്ന് റിപ്പോര്ട്ടുകള് വന്നിരുന്നു. നടപടി. എസ് പി സുജിത് ദാസിനെതിരെ നടപടിക്ക് ആഭ്യന്തരവകുപ്പ് ശുപാര്ശ നല്കിയിരുന്നെങ്കിലും സ്ഥലം മാറ്റത്തില് ഒതുക്കുകയായിരുന്നു. പി വി അന്വറുമായുള്ള സംഭാഷണം പൊലീസിനു നാണക്കേട് ഉണ്ടാക്കിയെന്നും, എസ് പി സുജിത് ദാസ് സര്വീസ് ചട്ടം ലംഘിച്ചുവെന്നും ഡിഐജി അജിതാ ബീഗം ഡിജിപിക്ക് നല്കിയ റിപ്പോര്ട്ടില് വ്യക്തമാക്കിയിരുന്നു.
