പാലക്കാട്: പാലക്കാട് ഉപതിരഞ്ഞെടുപ്പിലെ സ്ഥാനാര്ത്ഥികളുടെ പേരുകള് പുറത്തുവരുന്നു. സിപിഐഎം സ്ഥാനാര്ത്ഥിയായി ജില്ലാ പഞ്ചായത്ത് പ്രസിഡന്റ് കെ ബിനുമോള്, ഡിവൈഎഫ്ഐ നേതാവ് അഡ്വ. സഫ്ദര് ഷെരീഫ് എന്നിവരുടെ പേരുകളാണ് പുറത്തുവിട്ടത്. ബിജെപി സ്ഥാനാര്ത്ഥിയായി സി കൃഷ്ണകുമാര് മത്സരിക്കുമെന്നാണ് സൂചന.
അന്തരിച്ച സിപിഐഎം നേതാവ് ഇമ്പിച്ചി ബാവയുടെ മരുമകളാണ് കെ ബിനുമോള്. മലമ്പുഴ ഡിവിഷനില് നിന്നും ജില്ലാപഞ്ചായത്തിലേക്ക് തിരഞ്ഞെടുക്കപ്പെട്ട ബിനു മോള് സിപിഐഎം പാലക്കാട് ജില്ലാ കമ്മിറ്റി അംഗമാണ്. ഡിവൈഎഫ്ഐ നേതാവ് വി വസീഫിന്റെ പേര് മണ്ഡലത്തില് ഉയര്ന്നുകേട്ടെങ്കിലും ജില്ലയില് നിന്നുള്ളയാള് തന്നെ പാര്ട്ടി സ്ഥാനാര്ത്ഥിയാകട്ടെ എന്ന നിലയ്ക്കാണ് ചര്ച്ചകള് പുരോഗമിക്കുന്നത്.
അതേ സമയം, ബിജെപി സ്ഥാനാര്ത്ഥിയായി ബിജെപി സംസ്ഥാന അധ്യക്ഷന് കെ സുരേന്ദ്രന്, ശോഭ സുരേന്ദ്രന് എന്നിവരുടെ പേരുകളും നേരത്തെ ഉയര്ന്നിരുന്നു. എന്നാല് സി കൃഷ്ണകുമാറിനാണ് മുന്ഗണന എന്നാണ് സൂചന. മണ്ഡലത്തില് തെരഞ്ഞെടുപ്പ് പ്രവര്ത്തനമാരംഭിക്കാന് കൃഷ്ണകുമാറിന് കേന്ദ്ര നേതൃത്വത്തിന്റെ നിര്ദേശം ലഭിച്ചതായി വിവരം. ബിജെപിയുടെ സംസ്ഥാന ജനറല് സെക്രട്ടറിയായ കൃഷ്ണകുമാര്, ഇത്തവണത്തെ ലോക്സഭാ തിരഞ്ഞെടുപ്പില് പാലക്കാട് സ്ഥാനാര്ത്ഥിയായിരുന്നു. അതേസമയം സ്ഥാനാര്ത്ഥിത്വം സംബന്ധിച്ച് ഒദ്യോഗിക പ്രഖ്യാപനം വന്നിട്ടില്ല.
