പാലക്കാട്: കേരളത്തെ നടുക്കിയ തേങ്കുറിശ്ശി ദുരഭിമാന കൊലക്കേസില് കോടതി വിധി മറ്റന്നാള്. പാലക്കാട് ജില്ലാ സെഷന്സ് കോടതിയാണ് വിധി പറയുക. പ്രതിഭാഗം ശിക്ഷയില് ഇളവ് തേടിയിട്ടുണ്ട്. ഭാവിയില് ഇത്തരം സംഭവങ്ങള് പ്രതികള് ആവര്ത്തിക്കാന് സാഹചര്യമില്ലെന്ന് പ്രതിഭാഗം വാദിച്ചു. എന്നാല് പ്രതികള്ക്ക് തൂക്കുകയര് നല്കണമെന്നമെന്നാണ് പ്രൊസിക്യൂഷന്റെ വാദം. അതേ സമയം, പ്രത്യേകിച്ച് ഒന്നും പറയാനില്ലെന്ന് ഇരു പ്രതികളും കോടതിക്ക് മുന്പാകെ പറഞ്ഞു.
കൊല്ലത്തറ സ്വദേശി അനീഷിനെ ഭാര്യയുടെ ബന്ധുക്കള് കൊലപ്പെടുത്തിയ സംഭവത്തിലാണ് കോടതി മറ്റന്നാള് വിധി പറയുക. കേസില് അനീഷ് എന്ന അപ്പുവിന്റെ ഭാര്യാ പിതാവ് പ്രഭുകുമാര്, അമ്മാവന് സുരേഷ് കുമാര് എന്നിവര് കുറ്റക്കാരാണെന്ന് പാലക്കാട് ജില്ലാ അഡീഷണല് സെഷന്സ് കോടതി ജഡ്ജി ആര് വിനായക റാവു ഇന്നലെ വ്യക്തമാക്കിയിരുന്നു.
സാമ്പത്തികമായി ഉയര്ന്നനിലയിലുള്ള ഹരിതയെ ജാതിയിലും സമ്പത്തിലും അന്തരമുള്ള അനീഷ് പ്രണയിച്ച് വിവാഹം ചെയ്തതിനാണ് വിവാഹത്തിന്റെ 88-ാം ദിവസം ഹരിതയുടെ അച്ഛനും അമ്മാവനും അനീഷിനെ കുത്തിക്കൊലപ്പെടുത്തിയത്. ഡിസംബര് 25-ന് വൈകുന്നേരം പൊതുസ്ഥലത്തുവച്ചായിരുന്നു അനീഷിനെ വെട്ടിക്കൊലപ്പെടുത്തിയത്.
