തിരുവനന്തപുരം: പത്തനംതിട്ടയിലെ നഴ്സിങ് വിദ്യാര്ത്ഥിനി അമ്മു സജീവിന്റെ മരണത്തില് ക്രൈംബ്രാഞ്ച് അന്വേഷണം നടത്തണമെന്ന് ആവശ്യപ്പെട്ട് കെഎസ്യു. അമ്മുവിന്റെ മരണത്തിന് ഉത്തരവാദി ആയവരെ കണ്ടെത്തണമെന്നും സംഭവത്തില് അടിമുടി ദുരൂഹതയാണെന്നും കെഎസ്യു ആരോപിച്ചു. ഇക്കാര്യത്തില് കെഎസ്യു സംസ്ഥാന പ്രസിഡന്റ് ഡിജിപിക്ക് കത്ത് നല്കി. കോളേജ് പ്രിന്സിപ്പാളും അധികൃതരും വേട്ടക്കാര്ക്ക് ഒപ്പം നിന്നുവെന്നും കെഎസ്യു ആരോപിച്ചു.
അതേസമയം അമ്മുവിന്റെ മരണത്തില് ആത്മഹത്യാ പ്രേരണ കുറ്റം ചുമത്തി പൊലീസ് അറസ്റ്റ് ചെയ്ത മൂന്ന് സഹപാഠികളുടെ വൈദ്യപരിശോധന പൂര്ത്തിയായി. അലീന, അഷിത, അഞ്ജന എന്നീ വിദ്യാര്ത്ഥിനികള്ക്കെതിരെയാണ് ആത്മഹത്യാ പ്രേരണാ കുറ്റം ചുമത്തി അറസ്റ്റ് രേഖപ്പെടുത്തിയത്. അമ്മുവിനെ മാനസികമായി പീഡിപ്പിക്കുകയും ഉപദ്രവിക്കുകയും ചെയ്തിരുന്നുവെന്ന് കുടുംബം നല്കിയ മൊഴിയുടെ അടിസ്ഥാനത്തിലാണ് അറസ്റ്റ്. മൂന്ന് പേരെയും ഇന്ന് കോടതിയില് ഹാജരാക്കും.
