തിരുവനന്തപുരം: സംസ്ഥാന സ്കൂള് കലോത്സവത്തോട് അനുബന്ധിച്ച് മത്സരവേദികളായും താമസസൗകര്യത്തിനുമായി തിരഞ്ഞെടുത്ത സ്കൂളുകള്ക്ക് ജനുവരി 8 വരെ പൊതുവിദ്യാഭ്യാസ വകുപ്പ് അവധി പ്രഖ്യാപിച്ചു. കലോത്സവത്തിന് ബസുകള് വിട്ടുനല്കിയ സ്കൂളുകള്ക്കും അവധി ബാധകമായിരിക്കുമെന്ന് വിദ്യാഭ്യാസ വകുപ്പ് വാര്ത്താ കുറിപ്പില് അറിയിച്ചു. കലോത്സവത്തിനായി എത്തിയ ആയിരത്തോളം മത്സരാര്ഥികള്ക്കു നഗരത്തിലെ 27 സ്കൂളുകളിലായി താമസസൗകര്യം ഒരുക്കിയിട്ടുണ്ട്. ആണ്കുട്ടികള്ക്കു 16 സ്കൂളുകളിലും പെണ്കുട്ടികള്ക്കു 11 സ്കൂളുകളിലുമാണ് താമസം സജ്ജമാക്കിയിട്ടുള്ളത്.
അതേ സമയം, വലിയ ജനപങ്കാളിത്തത്തോടെ കലോത്സവും മുന്നേറുകയാണ്. ആവേശത്തിന്റെ കൊടുമുടിയില് തലസ്ഥാന നഗരി കലോത്സവ നിറവില് തിളങ്ങുകയാണ്. കലോത്സവത്തില് വിധി നിര്ണയത്തിലടക്കം തെറ്റായ രീതിയിലുള്ള ഇടപെടലുകള് ഉണ്ടാകാതിരിക്കാന് വിധികര്ത്താക്കളെ വളരെ സൂക്ഷ്മതയോടെയാണ് തെരഞ്ഞെടുത്തിട്ടുള്ളതെന്ന് വിദ്യാഭ്യാസ മന്ത്രി വാര്ത്താസമ്മേളനത്തില് അറിയിച്ചു.
