കൊച്ചി: നടി ഹണിറോസ് നല്കിയ ലൈംഗികാധിക്ഷേപ കേസില് ബോബി ചെമ്മണ്ണൂരിന്റെ ജാമ്യാപേക്ഷ പരിഗണിക്കുന്നത് ഹൈക്കോടതി ചൊവ്വാഴ്ച്ചത്തേക്ക് നീട്ടി. ഇതോടെ കാക്കനാട് ജില്ലാ ജയിലില് തന്നെ ചൊവ്വാഴ്ച വരെ തുടരും. സര്ക്കാരിനു മറുപടി പറയാന് സമയം നല്കണമെന്നു പറഞ്ഞാണ് കോടതി കേസ് മാറ്റിയത്. പൊതുഇടങ്ങളില് സംസാരിക്കുമ്പോള് ശ്രദ്ധിക്കേണ്ടെയെന്ന് ഓര്മപ്പെടുത്തിയ കോടതി എന്താണ് ഇത്ര ധൃതിയെന്നും അടിയന്തര പ്രാധാന്യം എന്താണെന്നും ചോദിച്ചു.
പരാതിക്കാരി സമൂഹമാധ്യമങ്ങളിലൂടെ നിരന്തരം വേട്ടയാടുകയാണെന്നും താന് നിരപരാധിയാണെന്നും ബോബി ചെമ്മണൂര് ഹര്ജിയില് പറയുന്നു. 2024 ഓഗസ്റ്റിലാണ് സംഭവം നടന്നത്. സംഭവത്തില് പരാതിയുമായി എത്തുന്നത് ഇപ്പോഴാണ്. അതുവരെ നടിക്ക് പരാതികള് ഒന്നും ഉണ്ടായിരുന്നില്ലെന്നും നല്ല സൗഹൃദത്തിലായിരുന്നെന്നും അത്തരം വീഡിയോകള് നടി തന്നെ സാമൂഹിക മാധ്യമങ്ങളില് പങ്കുവച്ചതായും ജാമ്യഹര്ജിയില് പറയുന്നു.
