സംസ്ഥാനത്ത് അടുത്ത നാലുദിവസം ഇടിമിന്നലോട് കൂടിയ ശക്തമായ മഴയ്ക്ക് സാധ്യത. ന്യൂനമര്ദ്ദം ശക്തി പ്രാപിക്കുന്നതും തെക്ക് പടിഞ്ഞാറന് ബംഗാള് ഉള്ക്കടലിനു മുകളില് മറ്റൊരു ചക്രവാതച്ചുഴിയും നിലനില്ക്കുന്നതുമാണ് മഴ ശക്തമാകാൻ കാരണമെന്ന കേന്ദ്ര കാലാവസ്ഥ വകുപ്പ് അറിയിച്ചു.
കേരള തീരത്ത് ഇന്ന് ( ബുധനാഴ്ച) രാത്രി 11.30 വരെ 1.0 മുതല് 1.5 മീറ്റര് വരെ ഉയര്ന്ന തിരമാലയ്ക്കും കടലാക്രമണത്തിനും സാധ്യതയുണ്ട്. മത്സ്യത്തൊഴിലാളികളും തീരദേശവാസികളും ജാഗ്രത പാലിയ്ക്കണമെന്നും കടലിൽ ഇറങ്ങിയുള്ള വിനോദ സഞ്ചാരം ഒഴിവാക്കണമെന്നും നിർദേശത്തിൽ പറയുന്നു.
തെക്ക് കിഴക്കന് ബംഗാള് ഉള്ക്കടലിനും ആന്ഡമാന് നിക്കോബര് ദ്വീപിനും മുകളിലായി രൂപപ്പെട്ട ന്യൂനമര്ദ്ദം പടിഞ്ഞാറു വടക്ക് പടിഞ്ഞാറു ദിശയില് സഞ്ചരിച്ച് വ്യാഴാഴ്ചയോടെ മധ്യ പടിഞ്ഞാറന് ബംഗാള് ഉള്ക്കടലില് തീവ്ര ന്യൂനമര്ദ്ദമായി ശക്തി പ്രാപിക്കാന് സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കുന്നു.
