തൃശൂർ: നിയമസഭാ തിരഞ്ഞെടുപ്പ് ചൂടുപിടിക്കുമ്പോൾ തൃശൂർ മണ്ഡലത്തിൽ യു.ഡി.എഫ് സ്ഥാനാർത്ഥിയായ രാജൻ ജെ. പല്ലൻ ശക്തമായ പ്രചാരണ പ്രവർത്തനങ്ങൾക്ക് ഇന്ന് ആവേശകരമായ തുടക്കം കുറിച്ചു. പ്രമുഖ കോൺഗ്രസ് നേതാവും മുൻ മുഖ്യമന്ത്രിയുമായ കെ. കരുണാകരന്റെ സ്മൃതിമണ്ഡപമായ മുരളി മന്ദിരത്തിൽ പുഷ്പാർച്ചന നടത്തി മുതിർന്ന നേതാക്കളുടെ സ്മരണ പുതുക്കിയ ശേഷമാണ് അദ്ദേഹം ഇന്നത്തെ പര്യടനം ആരംഭിച്ചത്.
“കോൺഗ്രസ് പ്രസ്ഥാനത്തിന് കരുത്ത് പകർന്ന നേതാക്കളുടെ ഓർമ്മകൾ എനിക്ക് വലിയ പ്രചോദനമാണ്,” എന്ന് രാജൻ ജെ. പല്ലൻ വ്യക്തമാക്കി.
തുടർന്ന് മുൻ മന്ത്രിയും മുതിർന്ന കോൺഗ്രസ് നേതാവുമായ സി. എൻ. ബാലകൃഷ്ണന്റെ വസതിയിൽ സന്ദർശനം നടത്തി കുടുംബാംഗങ്ങളുമായി അദ്ദേഹം ആശയവിനിമയം നടത്തി. മുൻ നേതാക്കളുടെ വികസന ദർശനം തൃശൂരിന്റെ പുരോഗതിക്കായി മുന്നോട്ട് കൊണ്ടുപോകുമെന്നു അദ്ദേഹം ഉറപ്പുനൽകി.
ഇന്ന് വൈകീട്ട് 4 മണിക്ക് യു.ഡി.എഫ് നേതാക്കളുടെ നേതൃത്വത്തിൽ രാജൻ ജെ. പല്ലന്റെ റോഡ് ഷോ സംഘടിപ്പിക്കും. തൃശൂർ ഡിസിസി ഓഫീസിൽ നിന്ന് ആരംഭിക്കുന്ന റോഡ് ഷോ കോർപ്പറേഷൻ ഓഫീസിന് സമീപം സമാപിക്കും.
തൃശൂർ കോർപ്പറേഷൻ മുൻ മേയർ എന്ന നിലയിൽ നഗരത്തിന്റെ എല്ലാ കോണുകളിലും പരിചയമുള്ള രാജൻ ജെ. പല്ലന് വോട്ടർമാരിൽ നിന്ന് മികച്ച പിന്തുണയാണ് ലഭിക്കുന്നത്. മണ്ഡലത്തിലെ വികസന മന്ദഗതിക്ക് അറുതി വരുത്താൻ യു.ഡി.എഫിനാണ് കഴിവുള്ളതെന്ന ആത്മവിശ്വാസത്തോടെയാണ് അദ്ദേഹം ജനങ്ങളിലേക്ക് ഇറങ്ങിച്ചെല്ലുന്നത്.
വരും ദിവസങ്ങളിൽ വിവിധ വാർഡുകളിലായി കുടുംബയോഗങ്ങൾ, പദയാത്രകൾ എന്നിവയും സംഘടിപ്പിക്കുമെന്ന് തിരഞ്ഞെടുപ്പ് കമ്മിറ്റി അറിയിച്ചു.
