28ാംമത് ഐ.എഫ്.എഫ്.കെ ഡെലിഗേറ്റ് രജിസ്ട്രേഷന് നാളെ മുതൽ ആരംഭിക്കും. രജിസ്ട്രേഷൻ തുടങ്ങാനിരിക്കെ ഡെലിഗേറ്റ് ഫീസ് ഉയർത്തിയിരിക്കുകയാണ് ചലച്ചിത്ര അക്കാദമി. പതിനെട്ട് ശതമാനം ജി എസ് ടി കൂടി ഉൾപ്പെടുത്തിയാണ് പുതിയ നിരക്ക്. ഇതനുസരിച്ച് ഡെലിഗേറ്റുകൾക്ക് 1180 രൂപയും സ്റ്റുഡന്റ് ഡെലിഗേറ്റുകൾക്ക് 590 രൂപയുമാണ് ഡെലിഗേറ്റ് ഫീസ്.
ഡെലിഗേറ്റ് രജിസ്ട്രേഷന് നാളെ രാവിലെ 10 മണിക്ക് ആരംഭിക്കും. www.iffk.in എന്ന വെബ്സൈറ്റില് നല്കിയിട്ടുള്ള ലിങ്കിലൂടെ ഡെലിഗേറ്റ് രജിസ്റ്റർ ചെയ്യാവുന്നതാണ്. മേളയുടെ മുഖ്യവേദിയായ ടാഗോര് തിയേറ്ററില് സജ്ജീകരിച്ചിട്ടുള്ള ഡെലിഗേറ്റ് സെല് മുഖേന നേരിട്ടും രജിസ്ട്രേഷന് നടത്താം.
എട്ടുദിവസങ്ങളിലായി നടക്കുന്ന മേളയില് വിവിധ രാജ്യങ്ങളില്നിന്നുള്ള 180 ഓളം ചിത്രങ്ങള് പ്രദര്ശിപ്പിക്കും. 15 തിയേറ്ററുകളിലായാണ് പ്രദര്ശനം നടക്കുക. സംവിധായകരും സാങ്കേതിക പ്രവര്ത്തകരും ജൂറി അംഗങ്ങളുമുള്പ്പെടെ വിവിധ വിദേശരാജ്യങ്ങളില്നിന്നുള്ള നൂറില്പ്പരം അതിഥികള് മേളയില് പങ്കെടുക്കും.
