നവകേരള സദസിന് ഇനി വിദ്യാര്ത്ഥികളെ പങ്കെടുപ്പിക്കില്ലെന്ന് സര്ക്കാര് ഹെെക്കോടതിയിൽ. ഇതു സംബന്ധിച്ച് വിദ്യാഭ്യാസ വകുപ്പ് ഇറക്കിയ എല്ലാ ഉത്തരവുകളും തിങ്കളാഴ്ചയോടെ പിന്വലിക്കുമെന്നും സര്ക്കാര് ഹൈക്കോടതിയെ അറിയിച്ചു. നവകേരള സദസിനായി സ്കൂള് ബസുകള് വിട്ടു കൊടുക്കണമെന്ന ഉത്തരവും പിന്വലിക്കും.
നവകേരള സദസില് പങ്കെടുപ്പിക്കാന് വിദ്യാര്ത്ഥികളെ പങ്കെടുപ്പിച്ചത് വിവാദമായ പശ്ചാത്തലത്തിലാണ് ഹെെക്കോടതിയുടെ ഉത്തരവ്. തലശ്ശേരിയില് നിന്നു കൂത്തുപറമ്പ് മണ്ഡലത്തിലെ പാനൂരിലേക്കു പോകുന്ന മുഖ്യമന്ത്രിയെയും മന്ത്രിമാരെയും അഭിവാദ്യം ചെയ്യാൻ കുട്ടികളെ റോഡില് നിര്ത്തിയിരുന്നു. സംഭവം വിവാദമായതോടെ കുട്ടികള് തണലത്താണ് നിന്നത് എന്ന് മുഖ്യമന്ത്രി പിണറായി വിജയന് പ്രതികരിച്ചു. കുട്ടികളെ ഒരു സ്കൂളില് നിന്ന് ഒരു പ്രത്യേകസമയത്ത് ഇറക്കി നിര്ത്തുന്നത് ഒരു ഗുണകരമായ കാര്യമല്ല. അത് ആ നിലക്ക് ആവര്ത്തിക്കണമെന്നില്ലെന്നും മുഖ്യമന്ത്രി പരഞ്ഞിരുന്നു.
നവകേരള സദസില് കുട്ടികളെ പങ്കെടുപ്പിക്കണമെന്ന് തിരൂരങ്ങാടി ഡിഇഒ സ്കൂള് പ്രധാന അധ്യാപകര്ക്ക് നിര്ദേശം നല്കിയിരുന്നു. ഓരോ സ്കൂളില് നിന്നും 200 കുട്ടികളെ എങ്കിലും എത്തിക്കണമെന്നായിരുന്നു നിര്ദേശം.
