സര്ക്കാരിന്റെ നയമാണ് സംസ്ഥാനത്തിന്റെ സാമ്പത്തിക പ്രതിസന്ധിക്ക് കാരണമെന്ന് ഗവര്ണര് ആരിഫ് മുഹമ്മദ് ഖാന്. മുഖ്യമന്ത്രി നയിക്കുന്ന നവകേരള യാത്ര കൊണ്ട് എന്തുപ്രയോജനമെന്നും പരാതി സ്വീകരിക്കുന്നതല്ലാതെ ഒരു പരിഹാരവും ഉണ്ടാകുന്നില്ലെന്നും ആരിഫ് മുഹമ്മദ്ഖാന് പറഞ്ഞു. ഡല്ഹിയില് മാധ്യമങ്ങളോട് പ്രതികരിക്കുകയായിരുന്നു അദ്ദേഹം.
സാമ്പത്തിക ഞെരുക്കത്തിന് കാരണം സര്ക്കാരിന്റെ നയങ്ങളാണെന്നും അനാവശ്യധൂര്ത്താണ് നടക്കുന്നതെന്നും അദ്ദേഹം പറഞ്ഞു. ക്ലിഫ് ഹൗസിലെ സിമ്മിങ് പൂള് നവീകരണത്തിനായി പത്ത് ലക്ഷമാണ് ചെലവിട്ടത്. അതേസമയം, സംസ്ഥാനത്ത് 35 വര്ഷം ജോലി ചെയ്തവര്ക്ക് പെന്ഷന് നല്കാന് സര്ക്കാരിന്റെ കൈവശം പണമില്ലെന്നും ഗവർണർ പറഞ്ഞു.
മുഖ്യമന്ത്രിയും മന്ത്രിമാരും നടത്തുന്ന നവകേരളസദസിനെതിരെയും രൂക്ഷമായ വിമര്ശനമാണ് ഗവര്ണര് ഉയര്ത്തിയത്. കേരളത്തില് എന്തിന്റെ പശ്ചാത്തലത്തിലാണ് യാത്ര നടത്തുന്നത്. മൂന്ന് ലക്ഷം പരാതി കിട്ടിയെന്നാണ് പറയുന്നത്. പരാതികൾ സെക്രട്ടേറിയറ്റില് തന്നെ നേരിട്ടെത്തി നല്കാവുന്നതാണ്. മാത്രമല്ല, പ്രശ്നങ്ങൾക്ക് പരിഹാരമാകുന്നില്ലെന്നും ഗവര്ണര് പറഞ്ഞു.
സെനറ്റിലേക്ക് താന് നാമനിര്ദേശം ചെയ്തവരുടെ ലിസ്റ്റ് മുഴുവന് ഹൈക്കോടതി സ്റ്റേ ചെയ്തിട്ടില്ലെന്നും ഗവര്ണര് പറഞ്ഞു. തന്റെ വിവേചനാധികാരം എങ്ങനെ പ്രയോഗിക്കണമെന്ന് സ്വയം തീരുമാനിക്കും. ആരെയും ബോധ്യപ്പെടുത്തേണ്ട ചുമതല തനിക്കില്ലെന്നും ഗവര്ണര് പറഞ്ഞു.
