ജിയോ ബേബി സംവിധാനം ചെയ്ത ‘കാതല് ദി കോര്’ സിനിമ സ്വവര്ഗ രതിയെ മഹത്വവത്കരിക്കുന്നതെന്ന് ചങ്ങനാശേരി രൂപത സഹായമെത്രാന് മാര് തോമസ് തറയില്. സിനിമ സഭയ്ക്ക് എതിരാണെന്നും മമ്മൂട്ടി അഭിനയിച്ച സിനിമയിലെ ഹോമോ സെക്ഷ്വാലിറ്റിയെ മഹത്വവത്ക്കരിക്കുന്ന എല്ലാ കഥാപാത്രങ്ങളും ക്രിസ്ത്യാനികള് ആയത് എന്തുകൊണ്ടാണെന്നും അദ്ദേഹം ചോദിച്ചു.
എംജിഒസിഎസ്എം വാര്ഷിക സമ്മേളനത്തില് സംസാരിക്കുകയായിരുന്നു ബിഷപ്.
സിനിമയുടെ കഥാപശ്ചാത്തലം ക്രൈസ്തവ ദേവലായങ്ങള് ആയത് എന്തുകൊണ്ടാണ്. ക്രെെസ്തവരുടെ സഹിഷ്ണുതയും നന്മയും ചൂഷണം ചെയ്യുകയാണ്. വേറെ ഏതെങ്കിലും മതത്തിന്റെ പശ്ചാത്തലത്തില് ആ സിനിമ എടുത്തിരുന്നെങ്കില് സിനിമ തീയേറ്റര് കാണില്ലായിരുന്നു. നമ്മുടെ സംസ്കാരത്തെ ആക്രമിക്കുന്ന പരിശ്രമങ്ങള് ഉണ്ടാകുമ്പോള് ജാഗ്രത വേണമെന്നും മാര് തോമസ് തറയില് പറഞ്ഞു.
മാധ്യമങ്ങള്ക്കെതിരെയും രൂക്ഷവിമള്ശനമുണ്ടായി. സഭയെ മാധ്യമങ്ങള് ഇരുട്ടിന്റെ മറവില് നിര്ത്തുകയാണെന്നും സഭയുടെ നന്മകള് മാധ്യമങ്ങള് പറയുന്നില്ലെന്നും മാര് തോമസ് തറയില് പറഞ്ഞു. ക്രൈസ്തവസഭയെ വെറും വിദ്യാഭ്യാസ കച്ചവടക്കാരായിട്ടാണ് ചിത്രീകരിക്കുന്നതെന്നും അദ്ദേഹം പറഞ്ഞു.
