ന്യൂഡല്‍ഹി: ഡല്‍ഹി മുഖ്യമന്ത്രി അരവിന്ദ് കെജ്രിവാള്‍ ഇഡി കസ്റ്റഡിയില്‍ നിന്ന് നഗരത്തിലെ ചില പ്രദേശങ്ങളിലെ ജല-മലിനജല സംബന്ധമായ പ്രശ്‌നങ്ങള്‍ പരിഹരിക്കാന്‍ ജലമന്ത്രി അതിഷിയോട് നിര്‍ദ്ദേശിച്ചു. സ്വന്തം ദുരവസ്ഥയ്ക്കിടയിലും ഡല്‍ഹിയിലെ ജനങ്ങളോട് കരുതല്‍ കാണിക്കുന്ന കെജ്രിവാളിനെ കുറിച്ച് ഓര്‍ക്കുമ്പോള്‍ തന്റെ കണ്ണുകളെ കണ്ണീരിലാഴ്ത്തിയെന്ന് ഒരു പത്രസമ്മേളനത്തെ അഭിസംബോധന ചെയ്ത് അതിഷി പറഞ്ഞു.
വേനല്‍ മാസം ആസന്നമായതിനാല്‍ ക്ഷാമമുള്ള പ്രദേശങ്ങളില്‍ ജലവിതരണം ശക്തമാക്കാന്‍ ആവശ്യത്തിന് വാട്ടര്‍ ടാങ്കറുകള്‍ വിന്യസിക്കാനും മുഖ്യമന്ത്രി നിര്‍ദ്ദേശം നല്‍കിയതായി അതിഷി പറഞ്ഞു.
ഇത് സംബന്ധിച്ച് ചീഫ് സെക്രട്ടറിക്കും മറ്റ് ഉദ്യോഗസ്ഥര്‍ക്കും നിര്‍ദ്ദേശം നല്‍കാന്‍ കെജ്രിവാള്‍ നിര്‍ദ്ദേശിച്ചതായി മന്ത്രി പറഞ്ഞു. ആവശ്യമെങ്കില്‍ ലഫ്റ്റനന്റ് ഗവര്‍ണര്‍ വി കെ സക്സേനയുടെ സഹായം തേടാനും അദ്ദേഹം നിര്‍ദ്ദേശിച്ചു.
മദ്യനയക്കേസില്‍ കെജ്രിവാളിനെ എന്‍ഫോഴ്‌സ്‌മെന്റ് ഡയറക്ടറേറ്റ് വ്യാഴാഴ്ച അദ്ദേഹത്തിന്റെ ഔദ്യോഗിക വസതിയില്‍ നിന്ന് അറസ്റ്റ് ചെയ്തിരുന്നു. വെള്ളിയാഴ്ച കോടതി അരവിന്ദ് കെജ്രിവാളിനെ മാര്‍ച്ച് 28 വരെ കേന്ദ്ര ഏജന്‍സിയുടെ കസ്റ്റഡിയില്‍ വിട്ടു.
