ചെന്നൈ: ചെന്നൈയില് കോടികളുടെ നാശം വിതച്ച് മൈചോങ് ചുഴലിക്കാറ്റ്. നാശനഷ്ടങ്ങളുമായി ബന്ധപ്പെട്ട് തമിഴ്നാട് 5,060 കോടി രൂപയുടെ ഇടക്കാലാശ്വാസം കേന്ദ്രത്തോട് ആവശ്യപ്പെട്ടതായി സംസ്ഥാന സര്ക്കാര് അറിയിച്ചു. മൊത്തം നാശനഷ്ടം വിലയിരുത്തുന്നതിനുള്ള സര്വേ നടക്കുന്നതിനാല് വിശദമായ റിപ്പോര്ട്ട് പിന്നീട് തയ്യാറാക്കുകയും അധിക ഫണ്ട് ആവശ്യപ്പെടുകയും ചെയ്യുമെന്ന് ഔദ്യോഗിക പത്രക്കുറിപ്പില് അറിയിച്ചു.
5,060 കോടി രൂപയുടെ ഇടക്കാലാശ്വാസം അനുവദിക്കണമെന്ന് ആവശ്യപ്പെട്ട് മുഖ്യമന്ത്രി എം കെ സ്റ്റാലിന് പ്രധാനമന്ത്രി നരേന്ദ്ര മോദിക്ക് ചൊവ്വാഴ്ച കത്തെഴുതിയതായും ഡിഎംകെ എംപി ടി ആര് ബാലു പ്രധാനമന്ത്രിക്ക് കത്ത് നല്കുമെന്നും അറിയിച്ചു. പ്രത്യേകിച്ച്, ചെന്നൈ കോര്പ്പറേഷന്റെ കീഴിലുള്ള പ്രദേശങ്ങളില് നാശനഷ്ടം രൂക്ഷമാണ്. റോഡുകള്, പാലങ്ങള്, പൊതു കെട്ടിടങ്ങള് തുടങ്ങിയ അടിസ്ഥാന സൗകര്യങ്ങള്ക്ക് സാരമായ കേടുപാടുകള് സംഭവിച്ചു. ലക്ഷക്കണക്കിന് ആളുകളുടെ ഉപജീവനത്തെ ബാധിച്ചു.
വടക്കന് ജില്ലകളായ ചെന്നൈ, തിരുവള്ളൂര്, കാഞ്ചീപുരം, ചെങ്കല്പേട്ട് എന്നിവിടങ്ങളില് ചുഴലിക്കാറ്റ് സൃഷ്ടിച്ച അഭൂതപൂര്വമായ മഴ മൂലമുണ്ടായ നാശനഷ്ടങ്ങള് സ്റ്റാലിന് കത്തില് വിശദമാക്കിയിട്ടുണ്ട്. കൂടാതെ, നാശനഷ്ടം വിലയിരുത്താന് കേന്ദ്രസംഘത്തെ നിയോഗിക്കണമെന്നും മുഖ്യമന്ത്രി ആവശ്യപ്പെട്ടിട്ടുണ്ട്.
