ഡല്ഹി: ആര്ട്ടിക്കിള് 370 റദ്ദാക്കിയ സുപ്രീം കോടതി വിധി ചരിത്രപരമാണെന്ന് പ്രധാനമന്ത്രി നരേന്ദ്ര മോദി പറഞ്ഞു. പാര്ലമെന്റ് തീരുമാനത്തെ ഭരണഘടനാപരമായി ഉയര്ത്തിപിടിക്കുന്നതാണ് വിധി. വിധി പ്രത്യാശയുടെ വെളിച്ചമാണെന്നും ശോഭനമായ ഭാവിയുടെ വാഗ്ദാനമാണെന്നും മോദി പറഞ്ഞു.
ആര്ട്ടിക്കിള് 370 റദ്ദാക്കിയതിനെക്കുറിച്ചുള്ള ഇന്നത്തെ സുപ്രീം കോടതി വിധി ചരിത്രപരവും 2019 ഓഗസ്റ്റ് 5 ന് ഇന്ത്യന് പാര്ലമെന്റ് എടുത്ത തീരുമാനത്തെ ഭരണഘടനാപരമായി ഉയര്ത്തിപ്പിടിക്കുന്നതുമാണ്. ഇത് പ്രതീക്ഷയുടെയും പുരോഗതിയുടെയും ഐക്യത്തിന്റെയും ഉജ്ജ്വലമായ പ്രഖ്യാപനമാണ്. ജമ്മു, കാശ്മീര്, ലഡാക്ക് എന്നിവിടങ്ങളിലെ നമ്മുടെ സഹോദരി സഹോദരന്മാര്ക്ക് വേണ്ടി, കോടതി, അതിന്റെ അഗാധമായ ജ്ഞാനത്തില്, ഇന്ത്യക്കാരെന്ന നിലയില്, മറ്റെല്ലാറ്റിനുമുപരിയായി ഞങ്ങള് കാത്തുസൂക്ഷിക്കുന്ന ഐക്യത്തിന്റെ സത്തയെ ശക്തിപ്പെടുത്തിയിട്ടുണ്ടെന്നും മോദി പറഞ്ഞു.
കശ്മീരിന്റെ പ്രത്യേക പദവി റദ്ദാക്കിയ കേന്ദ്ര നടപടി സുപ്രീം കോടതി ശരിവെക്കുകയായിരുന്നു. ഇന്ത്യയുടെ ഭാഗമായതോടെ കശ്മീരിന് പ്രത്യേക പരമാധികാരം ഇല്ലാതായെന്നും രാജ്യത്തെ എല്ലാ നിയമങ്ങളും കശ്മീരിനും ബാധകമാണെന്നും കോടതി പറഞ്ഞു. ആര്ട്ടിക്കിള് 370 യുദ്ധസാഹചര്യം കണക്കിലെടുത്ത് താത്ക്കാലികമായി ഏര്പ്പെടുത്തിയ സംവിധാനമായിരുന്നുവെന്നും കോടതി നിരീക്ഷിച്ചു. ജമ്മു കശ്മീരിന്റെ ഭരണഘടനയുടെ അനുച്ഛേദം 370 നിര്വ്വചിക്കുന്ന പ്രത്യേക പദവി റദ്ദാക്കിയത് ചോദ്യം ചെയ്തുള്ള ഹര്ജികളിലാണ് സുപ്രിംകോടതി ഇന്ന് വിധി പ്രഖ്യാപിച്ചത്.
