ന്യൂഡല്ഹി: നിലവിലുള്ള ഹൈവേ ടോള് പ്ലാസകള്ക്ക് പകരമായി അടുത്ത വര്ഷം മാര്ച്ചോടെ ജിപിഎസ് അടിസ്ഥാനമാക്കിയുള്ള ടോള് പിരിവ് സംവിധാനങ്ങള് ഉള്പ്പെടെയുള്ള പുതിയ സാങ്കേതികവിദ്യകള് സര്ക്കാര് അവതരിപ്പിക്കുമെന്ന് കേന്ദ്രമന്ത്രി നിതിന് ഗഡ്കരി പറഞ്ഞു. ഗതാഗതക്കുരുക്ക് കുറയ്ക്കാനും ഹൈവേകളില് സഞ്ചരിക്കുന്ന കൃത്യമായ ദൂരത്തിന് വാഹനമോടിക്കുന്നവരില് നിന്ന് പണം ഈടാക്കാനുമാണ് നടപടി. ഇതോടെ റോഡുകളില് ഫാസ്ടാഗുകളും ടോള് പ്ലാസകളും ഉടന് തന്നെ അപ്രത്യക്ഷമായേക്കും.
2018- 19 കാലയളവില്, ടോള് പ്ലാസയില് വാഹനങ്ങള്ക്കായുള്ള ശരാശരി കാത്തിരിപ്പ് സമയം 8 മിനിറ്റായിരുന്നു. 2020-21, 2021-22 കാലയളവില് ഫാസ്ടാഗുകള് അവതരിപ്പിച്ചതോടെ വാഹനങ്ങളുടെ ശരാശരി കാത്തിരിപ്പ് സമയം 47 സെക്കന്ഡായി കുറഞ്ഞു. ചില സ്ഥലങ്ങളില്, പ്രത്യേകിച്ച് നഗരങ്ങള്ക്ക് സമീപം ജനസാന്ദ്രതയേറിയ പട്ടണങ്ങളില് കാത്തിരിപ്പ് സമയത്തില് ഗണ്യമായ പുരോഗതിയുണ്ടെങ്കിലും തിരക്കേറിയ സമയങ്ങളില് ടോള് പ്ലാസകളില് ഇപ്പോഴും ചില കാലതാമസമുണ്ട്. നിലവില്, രാജ്യത്തുടനീളമുള്ള ഹൈവേകളില് സ്ഥാപിച്ചിട്ടുള്ള ഫിസിക്കല് ടോള് പ്ലാസകള് ഫാസ്ടാഗ് അടിസ്ഥാനമാക്കിയുള്ള സാങ്കേതികവിദ്യയിലൂടെ ടോള് ഫീസ് പിരിക്കുകയാണ് ചെയ്യുന്നത്. ഏകദേശം മൂന്ന് വര്ഷം മുമ്പാണ് ടോള് പിരിവിന്റെ നിര്ബന്ധിത രീതിയായി ഇത് അവതരിപ്പിച്ചത്.
