ആന്ധ്രാപ്രദേശ് മുന്‍ മുഖ്യമന്ത്രി വൈ എസ് രാജശേഖര റെഡ്ഡിയുടെ മകള്‍ വൈഎസ് ശര്‍മിള കോണ്‍ഗ്രസില്‍ ചേര്‍ന്നു. ഡല്‍ഹിയില്‍ പാര്‍ട്ടി അധ്യക്ഷന്‍ മല്ലികാര്‍ജുന്‍ ഖാര്‍ഗെയുടെയും മുന്‍ അധ്യക്ഷന്‍ രാഹുല്‍ ഗാന്ധിയുടെയും സാന്നിധ്യത്തിലായിരുന്നു ചടങ്ങ്. തന്നെ ഏല്‍പ്പിക്കുന്ന ഏത് ഉത്തരവാദിത്തവും നിറവേറ്റുമെന്നും അവര്‍ പറഞ്ഞു.
രാജ്യതലസ്ഥാനത്തെ എഐസിസി ആസ്ഥാനത്ത് പാര്‍ട്ടി പ്രവര്‍ത്തകരെയും അനുഭാവികളെയും അഭിസംബോധന ചെയ്യവെ ശര്‍മിള രാഷ്ട്രീയ ശക്തികളുടെ ഏകീകരണത്തില്‍ സന്തോഷം പ്രകടിപ്പിച്ചു. ഇന്ന് വൈഎസ്ആര്‍ തെലങ്കാന പാര്‍ട്ടിയെ കോണ്‍ഗ്രസ് പാര്‍ട്ടിയില്‍ ലയിപ്പിക്കുന്നതില്‍ എനിക്ക് അതിയായ സന്തോഷമുണ്ട്. വൈഎസ്ആര്‍ തെലങ്കാന പാര്‍ട്ടി ഇന്ന് മുതല്‍ ഇന്ത്യന്‍ നാഷണല്‍ കോണ്‍ഗ്രസിന്റെ ഭാഗമാകാന്‍ പോകുന്നു എന്നതില്‍ സന്തോഷിക്കുന്നുവെന്നും അവര്‍ പറഞ്ഞു.
അതേ സമയം, തെലങ്കാനയില്‍ കോണ്‍ഗ്രസ് പാര്‍ട്ടിയെ ശക്തിപ്പെടുത്താനും വരാനിരിക്കുന്ന സംസ്ഥാന തിരഞ്ഞെടുപ്പിന് മുന്നോടിയായി ഐക്യമുന്നണി രൂപീകരിക്കാനും ലക്ഷ്യമിട്ടുള്ള തന്ത്രപരമായ നീക്കമായാണ് ലയനത്തെ കാണുന്നത്. തെലങ്കാനയില്‍ അടുത്തിടെ നടന്ന നിയമസഭാ തിരഞ്ഞെടുപ്പില്‍ വൈഎസ് ശര്‍മിള നിരന്തരം കോണ്‍ഗ്രസ് പാര്‍ട്ടിക്ക് പിന്തുണ നല്‍കിയിരുന്നു.
