ബഹിരാകാശത്ത് ഫ്യുവല് സെല് പവര് സിസ്റ്റം പരീക്ഷണം വിജയിപ്പിച്ച് ഐഎസ്ആര്ഒ. 350 കിലോമീറ്റര് ഉയരത്തില് 180 വാള്ട്ട് വൈദ്യുതിയാണ് ഫ്യുവല് സെല് ഉല്പ്പാദിപ്പിച്ചത്. ഇസ്റോയുടെ വിക്രം സാരാഭായ് സ്പേസ് സെന്റര് (വിഎസ്എസ്സി) ആണ് ഫ്യുവല് സെല് നിര്മിച്ചത്. ബഹിരാകാശ വൈദ്യുതി ഉല്പാദനത്തിലെ സുപ്രധാന കുതിച്ചുചാട്ടത്തെയാണ് ഈ പരീക്ഷണം സൂചിപ്പിക്കുന്നത്.
ഹൈഡ്രജനും ഓക്സിജനും ഉപയോഗിച്ചാണ് വൈദ്യുതി ഉല്പാദിക്കുന്നതെന്നും ഇതില് നിന്ന് പുറംതള്ളുന്നത് ജലം മാത്രമാണെന്നും മറ്റു തരത്തിലുള്ള ഒരു വാതകവും പുറംതള്ളുന്നില്ലെന്നും ഐഎസ്ആര്ഒ വ്യക്തമാക്കി. ഭാവിയില് ബഹിരാകാശ പദ്ധതികളില് ബാക്കപ്പ് സിസ്റ്റമായും ഇത് ഉപയോഗിക്കാന് കഴിയും.
