ന്യൂഡല്ഹി: മുന് ഇന്ത്യന് ക്രിക്കറ്റ് താരം റോബിന് ഉത്തപ്പയ്ക്കെതിരെ 23 ലക്ഷം രൂപയുടെ പ്രൊവിഡന്റ് ഫണ്ട് (പിഎഫ്) തട്ടിപ്പ് ആരോപണത്തെ തുടര്ന്ന് അറസ്റ്റ് വാറണ്ട്. പിഎഫ് റീജിയണല് കമ്മീഷണര് എസ് ഗോപാല് റെഡ്ഡിയാണ് വാറന്റ് പുറപ്പെടുവിച്ചത്. ജീവനക്കാരുടെ പി എഫ് അക്കൗണ്ടില് നിന്നും 23 ലക്ഷം രൂപയുടെ തട്ടിപ്പ് നടത്തിയെന്നാണ് താരത്തിന് എതിരെയുളള ആരോപണം.
സെഞ്ചുറീസ് ലൈഫ് സ്റ്റൈല് ബ്രാന്ഡ് പ്രൈവറ്റ് ലിമിറ്റഡ് എന്ന സ്വകാര്യ കമ്പനി കൈകാര്യം ചെയ്തിരുന്ന ഉത്തപ്പ, ജീവനക്കാരുടെ ശമ്പളത്തില് നിന്ന് പിഎഫ് വിഹിതം വെട്ടിക്കുറച്ചതായി പരാതിയുണ്ട്. ഡിസംബര് നാലിനാണ് റീജിയണല് കമ്മീഷണര് റോബിന് ഉത്തപ്പയ്ക്കെതിരെ അറസ്റ്റ് വാറന്റ് നടപ്പിലാക്കാന് പൊലീസിന് നിര്ദ്ദേശം നല്കിയത്. എന്നാല് താരം താമസം മാറിയതിനാല് വാറണ്ട് പിഎഫ് ഓഫീസിലേക്ക് തിരിച്ചയക്കുകയായിരുന്നു. 23 ലക്ഷം രൂപയുടെ തട്ടിപ്പ് നടത്തിയെന്നാണ് ആരോപണം. 2022 സെപ്തംബറില് ക്രിക്കറ്റില് നിന്ന് വിരമിച്ച ശേഷം കഴിഞ്ഞ ഒരു വര്ഷമായി താരം കുടുംബത്തോടൊപ്പം ദുബായിലാണ് താമസിക്കുന്നത്.
