കൊച്ചി: മലയാള സിനിമ മേഖലയിലെ പ്രമുഖര്ക്കെതിരെ ഉയര്ന്ന ആരോപണങ്ങളില് പ്രതികരിച്ച് നടനും എഎംഎംഎ അംഗവുമായ പൃഥ്വിരാജ്. ഹേമ കമ്മിറ്റി റിപ്പോര്ട്ടില് പഴുതടച്ച അന്വേഷണം വേണമെന്നും കുറ്റക്കാരെ മാതൃകപരമായി ശിക്ഷിക്കണമെന്നും പൃഥ്വിരാജ് പറഞ്ഞു. നിലവിലെ വിവാദങ്ങള് സിനിമാ മേഖലയെ എങ്ങനെ ബാധിക്കണമോ അങ്ങനെ തന്നെ ബാധിക്കണം. അന്വേഷണത്തിനൊടുവില് കുറ്റകൃത്യങ്ങള് തെളിയിക്കപ്പെട്ടാല് മാതൃകാപരമായ ശിക്ഷാ നടപടികള് ഉണ്ടാകണം. ആരോപണങ്ങള് തെറ്റാണെന്ന് തെളിഞ്ഞാല് തിരിച്ചും നടപടി ഉണ്ടാകണം. അങ്ങനെ മാത്രമെ ഇതിന് ഇവസാനം ഉണ്ടാക്കാന് സാധിക്കൂവെന്ന് പൃഥ്വിരാജ് നിലപാട് വ്യക്തമാക്കി.
ഇരകളുടെ പേരുകള് മാത്രമാണ് സംരക്ഷിക്കപ്പെടേണ്ടത്. ആരോപണവിധേയരുടെ പേര് പുറത്തുവിടുന്നതില് നിയമ തടസ്സമില്ലെന്നും പൃഥ്വിരാജ് പറഞ്ഞു. താര സംഘടനയായ അമ്മയ്ക്ക് വീഴ്ച്ച സംഭിച്ചുവെന്ന് പൃഥ്വിരാജ് പറഞ്ഞു. ആരോപണ വിധേയര് സ്ഥാനം ഒഴിഞ്ഞ് അന്വേഷണം നേരിടണമെന്ന് അദ്ദേഹം ആവശ്യപ്പെട്ടു. അമ്മയുടെ നിലപാട് ദുര്ബലമാണെന്ന് പൃഥ്വിരാജ് കുറ്റപ്പെടുത്തി. അമ്മ ശക്തമായ നിലപാട് എടുക്കണമെന്ന് അദ്ദേഹം പറഞ്ഞു.
ഹേമ കമ്മിറ്റി റിപ്പോര്ട്ടില് ഞെട്ടലില്ല. ഹേമ കമ്മിറ്റിയുമായി ആദ്യം സംസാരിച്ചവരില് ഒരാളാണ് താന്. കുറ്റകൃത്യങ്ങളില് തുടര്നടപടി എന്താണെന്ന് അറിയാന് നിങ്ങളെപോലെ എനിക്കും ആകാക്ഷയുണ്ട്. പരാതികളില് അന്വേഷണം നടത്തുന്നത് അടക്കം നിലവിലെ വിവാദങ്ങളില് എഎംഎംഎയ്ക്ക് വീഴ്ച്ച സംഭവിച്ചുവെന്നതില് സംശയമില്ല. തനിക്ക് ചുറ്റുമുള്ള വര്ക്ക്സ്പേസ് സുരക്ഷിതമാക്കും എന്ന് പറയുന്നതില് തീരുന്നതല്ല ഒരാളുടെയും ഉത്തരവാദിത്തം. താന് ഇതിന്റെ ഭാഗമാകില്ല എന്ന് പറയുന്നിടത്ത് തീരുന്നില്ല ഉത്തരവാദിത്തമെന്നും താരം പറഞ്ഞു. എഎംഎംഎ തിരുത്തണം. ശക്തമായ ഇടപെടല് സംഘടനയുടെ ഭാഗത്ത് നിന്നും ഉണ്ടാകണം. സ്ഥാനത്ത് ഇരിക്കുന്നവര്ക്കെതിരെ ആരോപണം വരികയാണെങ്കില് അതില് നിന്ന് മാറിനിന്ന് അന്വേഷണത്തെ നേരിടുകയെന്നതാണ് മര്യാദ. പവര് ഗ്രൂപ്പ് ഉണ്ടെങ്കില് ഇല്ലാതാകണം. പവര് അതോറിറ്റിയെ താന് അഭിമുഖീകരിച്ചിട്ടില്ലായെന്ന് പറഞ്ഞാല് തീരില്ലെന്നും പൃഥ്വിരാജ് പറഞ്ഞു.
