തിരുവനന്തപുരം: മുണ്ടക്കൈ-ചൂരല്മല ഉരുള്പൊട്ടലില് മാതാപിതാക്കള് നഷ്ടപ്പെട്ട കുട്ടികളെ ദത്തെടുക്കാന് അപേക്ഷ സ്വീകരിക്കുന്നുവെന്ന തരത്തില് വ്യാജപ്രചരണം നടത്തുന്നവര്ക്കെതിരെ നിയമനടപടികള് സ്വീകരിക്കാന് ആരോഗ്യമന്ത്രി വീണാ ജോര്ജ് നിര്ദേശം നല്കി. ഉരുള്പൊട്ടലില് മാതാപിതാക്കള് മരണപ്പെട്ട കുട്ടികളെ സ്വകാര്യ ആശുപത്രിയില് നിന്ന് അടക്കം ഇത്തരത്തില് നല്കുന്നുണ്ടെന്നും സോഷ്യല് മീഡിയയിലൂടെയും അല്ലാതെയും വ്യാജ പ്രചരണം നടക്കുന്നുണ്ട്. വനിത ശിശു വികസന വകുപ്പ് ഡയറക്ടര് ഹരിതാ വി കുമാര് ഐഎഎസിനോട് വിഷയത്തില് പൊലീസില് പരാതി നല്കാനും മന്ത്രി നിര്ദ്ദേശിച്ചു.
ഇങ്ങനെ പ്രചരിപ്പിക്കുന്നവരുടെ ഉദ്ദേശം, പ്രവര്ത്തനം, മറ്റു ബന്ധങ്ങള് എന്നിവ സംബന്ധിച്ച് സമഗ്ര അന്വേഷണം നടത്തി നിയമപരമായ ശിക്ഷ ഉറപ്പാക്കുന്നതിന് നടപടികള് സ്വീകരിക്കുമെന്നും മന്ത്രി പറഞ്ഞു. ഉരുള്പൊട്ടലിന്റെ സാഹചര്യത്തില് നടന്ന അവലോകന യോഗത്തില് സംസാരിക്കുകയായിരുന്നു മന്ത്രി.
ക്യാമ്പുകളില് ചെക്ക്ലിസ്റ്റ് അനുസരിച്ചുള്ള പ്രവര്ത്തനങ്ങള് ക്രോഡീകരിക്കണം. മാതാപിതാക്കളില് ഒരാള് നഷ്ടപ്പെട്ടവരുടെ കൂടി കണക്ക് എടുക്കാന് മന്ത്രി നിര്ദേശം നല്കി. കുട്ടികള്ക്ക് വാക്സിനേഷനും ഉറപ്പാക്കിയിട്ടുണ്ട്.
