വയനാട്ടില് നിലവില് കുട്ടികളെ ദത്ത് എടുക്കേണ്ട സാഹചര്യം ഇല്ലെന്ന് മന്ത്രി വീണ ജോര്ജ്. കുട്ടികളെ ദത്ത് എടുക്കുന്നതിന് ഒരുപാട് അന്വേഷണങ്ങള് വരുന്ന സാഹചര്യത്തിലാണ് ആരോഗ്യമന്ത്രിയുടെ പ്രതികരണം. വയനാട്ടിലെ ദുരന്തത്തില് മാതാപിതാക്കള് നഷ്ടപ്പെട്ടത് വളരെ ചുരുക്കം കുഞ്ഞുക്കള്ക്കാണെന്നും
അവര് എല്ലാവരും ബന്ധുക്കളുടെ സംരക്ഷണത്തില് ആണെന്നും മന്ത്രി പറഞ്ഞു. കുഞ്ഞുങ്ങളെ ഏറ്റെടുക്കാമെന്ന് പറയുന്നത് ഹൃദയ വിശാലത കൊണ്ടാണെന്ന് പറഞ്ഞ ആരോഗ്യമന്ത്രി അതിന് പ്രത്യേക നന്ദിയും അറിയിച്ചു.
അതേസമയം വയനാട് ഉരുള്പൊട്ടലിന് ഇരയായ മുഴുവന് കുടുംബങ്ങളുടെയും പുനരധിവാസം സര്ക്കാര് സാധ്യമാക്കുമെന്ന് റവന്യൂ വകുപ്പ് മന്ത്രി കെ രാജന് അറിയിച്ചു. ദുരിതാശ്വാസ ക്യാമ്പുകളില് കഴിയുന്നവരുടെ ക്യാമ്പുകളിലും കുടുംബവീടുകളിലും ആശുപത്രിയിലും കഴിയുന്നവര് ഉള്പ്പെടെ അര്ഹരായ മുഴുവന് പേര്ക്കും സഹായം ലഭ്യമാക്കും. പുനരധിവാസ പദ്ധതിയില് ഉള്പ്പെടാന് ദുരിതാശ്വാസ ക്യാംപുകളില് രജിസ്റ്റര് ചെയ്യണമെന്ന രീതിയില് നടക്കുന്ന പ്രചാരണങ്ങളില് കഴമ്പില്ലെന്നും അദ്ദേഹം വ്യക്തമാക്കി.
