മലപ്പുറം: നിപ ഭീതി ഒഴിഞ്ഞതോടെ മലപ്പുറം ജില്ലയില് നിയന്ത്രണങ്ങള് ഒഴിവാക്കി. കണ്ടെയ്ന്മെന്റ് സോണിലെ നിയന്ത്രണങ്ങളും ജില്ലയില് മാസ്ക് നിര്ബന്ധമാക്കിയതും പിന്വലിച്ച് കലക്ടര് ഉത്തരവിട്ടു. തിരുവാലി പഞ്ചായത്തിലെ 4,5,6,7 വാര്ഡുകളും മമ്പാട് പഞ്ചായത്തിലെ 7 വാര്ഡുകളുമായിരുന്നു കണ്ടെയ്ന്മെന്റ് സോണായി പ്രഖ്യാപിച്ചിരുന്നത്. ഈ പ്രദേശങ്ങളിലെ വിദ്യാലയങ്ങള് ഇന്നു തുറക്കും.
സമ്പര്ക്കപ്പട്ടികയിലെ 94 പേരുടെ ക്വാറന്റീന് ഇന്ന് അവസാനിക്കും. ഇന്നലെ ഫലം ലഭിച്ച 16 സാംപിളുകളും നെഗറ്റീവാണ്. ഇതുവരെ 104 പരിശോധനാ ഫലങ്ങളാണ് നെഗറ്റീവായത്. രോഗലക്ഷണങ്ങളുമായി ഒരാള് ഇന്നലെ മഞ്ചേരി മെഡിക്കല് കോളജ് ആശുപത്രിയില് പ്രവേശിപ്പിച്ചു.
