സൗജന്യ വൈദ്യുതിയും ആരോഗ്യ പരിരക്ഷയടക്കം പത്ത് ഗ്യാരന്റിയുമായി അരവിന്ദ് കെജ്രിവാള്‍

ന്യൂഡല്‍ഹി: 2024ലെ ലോക്സഭാ തിരഞ്ഞെടുപ്പില്‍ ആം ആദ്മി പാര്‍ട്ടി വിജയിച്ചാല്‍ ജനങ്ങള്‍ക്കായുള്ള പത്ത് ഉറപ്പുകള്‍ വെളിപ്പെടുത്തി അരവിന്ദ് കെജ്രിവാള്‍. സൗജന്യ വൈദ്യുതി, മെച്ചപ്പെട്ട ആരോഗ്യ സംരക്ഷണം എന്നിവയ്ക്കുള്ള പ്രതിജ്ഞകള്‍ ഉള്‍പ്പെടെയുള്ള പൊതുജനക്ഷേമ സംരംഭങ്ങളുടെ വിശാലമായ പത്ത് ഉറപ്പുകളാണ് അരവിന്ദ് കെജ്രിവാള്‍ നല്‍കിയത്. വാഗ്ദാനങ്ങളില്‍ ബിജെപി എന്നും പരാജയപ്പെട്ടവരാണ്. എന്റെ ഗ്യാരന്റി ട്രാക്ക് റെക്കോര്‍ഡ് തെളിയിച്ചിട്ടുണ്ടെന്നും അദ്ദേഹം പറഞ്ഞു. തന്റെ അറസ്റ്റ് ചെയ്തതിന് ശേഷം ആംആദ്മി പാര്‍ട്ടി കൂടുതല്‍ ഐക്യപ്പെട്ടിട്ടുണ്ട്. തന്റെ അഭാവത്തില്‍ എംഎല്‍എമാര്‍ നന്നായി പ്രവര്‍ത്തിച്ചു. അറസ്റ്റ് ചെയ്ത് പാര്‍ട്ടിയെ തകര്‍ക്കാനും സര്‍ക്കാരിനെ വീഴ്ത്താനും ആയിരുന്നു ശ്രമം. എന്നാല്‍ സംഭവിച്ചത് മറിച്ചാണെന്നും കെജ്രിവാള്‍ പറഞ്ഞു.

കെജ്രിവാളിന്റെ തിരഞ്ഞെടുപ്പ് വാഗ്ദാനങ്ങളില്‍ മുന്‍പന്തിയില്‍ നില്‍ക്കുന്നത് എല്ലാവര്‍ക്കും സൗജന്യ വൈദ്യുതി എന്ന ഉറപ്പാണ്. പ്രത്യേകിച്ച് സമൂഹത്തിലെ സാമ്പത്തികമായി പിന്നാക്കം നില്‍ക്കുന്ന വിഭാഗങ്ങളെ ലക്ഷ്യമിട്ടാണ്. ഡല്‍ഹിയുടെ തടസ്സമില്ലാത്ത വൈദ്യുതി വിതരണത്തിന്റെ മാതൃക രാജ്യവ്യാപകമായി ആവര്‍ത്തിക്കണമെന്ന് എഎപി മേധാവി വാദിച്ചു. 10 ഗ്യാരന്റികളില്‍ രാജ്യത്ത് 24 മണിക്കൂറും വൈദ്യുതി നല്‍കുമെന്നതാണ് ആദ്യത്തെ ഉറപ്പ്. എല്ലാ പാവപ്പെട്ടവര്‍ക്കും 200 യൂണിറ്റ് വരെ സൗജന്യ വൈദ്യുതി നല്‍കുമെന്ന് കെജ്രിവാള്‍ പറഞ്ഞു.

കെജ്രിവാളിന്റെ തിരഞ്ഞെടുപ്പ് ഗ്യാരണ്ടി പട്ടികയില്‍ രണ്ടാമത്തേത് സര്‍ക്കാര്‍ സ്‌കൂളുകളിലെ വിദ്യാഭ്യാസം നവീകരിക്കുകയാണ്. അത് പരിഹരിക്കാന്‍ 5 ലക്ഷം കോടി രൂപ വേണ്ടിവരുമെന്നും മൊത്തം ചെലവ് നികത്താന്‍ സംസ്ഥാന സര്‍ക്കാരുകളും കേന്ദ്രവും 2.5 ലക്ഷം കോടി രൂപ വീതം നല്‍കണമെന്നും ഡല്‍ഹി മുഖ്യമന്ത്രി അവകാശപ്പെട്ടു. ഇന്ന് നമ്മുടെ സര്‍ക്കാര്‍ സ്‌കൂളുകളുടെ അവസ്ഥ അത്ര നല്ലതല്ല. എല്ലാവര്‍ക്കും നല്ലതും മികച്ചതുമായ സൗജന്യ വിദ്യാഭ്യാസം ഞങ്ങള്‍ ക്രമീകരിക്കുമെന്നതാണ് ഞങ്ങളുടെ രണ്ടാമത്തെ ഉറപ്പ്. സ്വകാര്യ സ്‌കൂളുകളേക്കാള്‍ മികച്ച വിദ്യാഭ്യാസം സര്‍ക്കാര്‍ സ്‌കൂളുകള്‍ നല്‍കും. ഡല്‍ഹിയിലും പഞ്ചാബിലും ഞങ്ങള്‍ അത് ചെയ്തിട്ടുണ്ട്. അഞ്ച് ലക്ഷം കോടി രൂപ ഇതിനായി വേണ്ടിവരും. ഇതിനായി സംസ്ഥാന സര്‍ക്കാരുകള്‍ 2.5 ലക്ഷം കോടി രൂപയും കേന്ദ്ര സര്‍ക്കാര്‍ 2.5 കോടി രൂപയും നല്‍കുമെന്നും അദ്ദേഹം പറഞ്ഞു. സൗജന്യ ചികിത്സ, ആരോഗ്യരംഗത്തെ അടിസ്ഥാന സൗകര്യ വികസനം, ഹാനികരമായ അഗ്‌നിവീര്‍ പദ്ധതി റദ്ദാക്കും, ചൈന കൈവശപ്പെടുത്തിയ ഇന്ത്യന്‍ പ്രദേശങ്ങള്‍ തിരിച്ചുപിടിക്കും, കാര്‍ഷിക വിളകള്‍ക്ക് എംഎസ്പി ഉറപ്പാക്കും, ജിഎസ്ടി നിയമത്തില്‍ സമഗ്രമായ പരിഷ്‌കരണം ഉള്‍പ്പെടെയാണ് പത്ത് ഗ്യാരന്റികള്‍.