തിരുവനന്തപുരം: സിനിമ മേഖലയില് ഉയരുന്ന ലൈംഗികാരോപണങ്ങളില് പ്രത്യേക സംഘത്തിന്റെ അന്വേഷണം ഇന്ന് ആരംഭിക്കും. ഐജി സ്പര്ജന്കുമാറിന്റെ നേതൃത്വത്തിലാണ് അന്വേഷണം. പരാതിക്കാരുടെ മൊഴിയെടുത്ത ശേഷം തുടര് നടപടി സ്വീകരിക്കും. സിനിമാ രംഗത്ത് പ്രവര്ത്തിക്കുന്ന സ്ത്രീകള് അഭിമുഖീകരിക്കേണ്ടിവന്ന ദുരനുഭവങ്ങള് വിവരിക്കുന്ന അഭിമുഖങ്ങളും പ്രസ്താവനകളും പുറത്തുവന്നതോടെയാണ് മുഖ്യമന്ത്രി ഉന്നത പോലീസ് ഉദ്യോഗസ്ഥരുടെ യോഗം വിളിച്ചു ചേര്ത്തത്.
സിനിമാ മേഖലയിലെ ഉന്നതരെ കുറിച്ച് ഉയര്ന്ന ലൈംഗികാരോപണങ്ങള് സര്ക്കാരിനെയും പ്രതിരോധിത്തിലാക്കിയതോടെയാണ് മുഖ്യമന്ത്രി ഇടപെട്ട് അന്വേഷണത്തിന് പ്രത്യേക സംഘത്തെ നിയോഗിച്ചത്. മുഖ്യമന്ത്രി പിണറായി വിജയന് ഡിജിപിയുമായി ചര്ച്ച നടത്തിയിരുന്നു. നിയമോപദേശം തേടിയതിന്റെ അടിസ്ഥാനത്തില് കൂടിയായിരുന്നു തീരുമാനം. ആരോപണം ഉന്നയിച്ചവര് പരാതിയില് ഉറച്ചുനിന്നാല് കേസെടുക്കാനാണ് തീരുമാനം.
ഇത്തരം പരാതികളും വെളിപ്പെടുത്തലുകളും സംബന്ധിച്ച് അന്വേഷിക്കാന് പോലീസ് ഐജി സ്പര്ജന് കുമാറിന്റെ നേതൃത്വത്തില് ഉയര്ന്ന വനിതാ പോലീസ് ഓഫീസര്മാര് ഉള്പ്പെടുന്ന ഒരു പ്രത്യേക അന്വേഷണസംഘം രൂപീകരിക്കാന് തീരുമാനിച്ചു. പ്രസ്തുത സ്പെഷ്യല് ടീമിന്ന് ക്രൈംബ്രാഞ്ച് എഡിജിപി എച്ച് വെങ്കിടേഷ് മേല്നോട്ടം വഹിക്കും. എസ്. അജീത ബീഗം – ഡിഐജി, മെറിന് ജോസഫ് – എസ്.പി ക്രൈംബ്രാഞ്ച് , ജി. പൂങ്കുഴലി – എഐജി, കോസ്റ്റല് പോലീസ്, ഐശ്വര്യ ഡോങ്ക്റെ – അസി. ഡയറക്ടര്
കേരള പോലീസ് അക്കാദമി, അജിത്ത് .വി – എഐജി, ലോ&ഓര്ഡര്, മധുസൂദനന് – എസ്.പി ക്രൈംബ്രാഞ്ച് തിരുവനന്തപുരം എന്നിവരും സംഘത്തിലുണ്ട്.
